ရှေးဦးစွာ ဒိုမိန်းနိမ်း (Domain Name) ဘာကြောင့် လိုအပ်သလဲ ဆိုတာ ရှင်းပြပါမယ်။ ကွန်ပျူတာ “Word pad” တစ်ခုခု ပေါ်မှာ စာရိုက်လိုက်ပြီဆိုပါတော့။ ရိုက်ပြီးတဲ့ စာကို ကွန်ပျူတာထဲ ထည့်သိမ်းမယ် ဆိုရင် ဖိုင်နာမည် ပေးပြီး သိမ်းကြရမှာ မဟုတ်လား။ နောက်ပိုင်းမှာ အဲဒီ ကိုယ်ရေးပြီး သိမ်းထားခဲ့တဲ့ စာကို တစ်ယောက်ယောက်ကို ပေးဖတ်ချင်တယ်ဆိုရင် အဲဒီစာ ဘယ်မှာသိမ်းထားတယ် ဆိုတာ ပြောပြမှ တစ်ခြား တစ်ယောက်က ရှာပြီး ဖွင့်ဖတ်လို့ ရမှာပေါ့။ ဒီတော့ သူ့ကို ဘယ်ဖိုလ်ဒါ (Folder) အောက်မှာ ဘာဖိုင်နာမည်နဲ့ ဆိုတာ ပြောရပါမယ်။ နေရာကို ညွှန်းပေး (ညွန်ပြပေး) ရတာပေါ့။ ဒီလိုပါဘဲ၊ အင်တာနက်ပေါ်မှာ ဆိုတာ အင်တာနက် အဆက်အသွယ်ကနေ တဆင့် ချိတ်ဆက်ပြီး ကြည့်လို့ရတဲ့ ကွန်ပျူတာ တစ်ခုပေါ်မှာ အလုပ်လုပ်နေတာဘဲ။ စာရိုက်ပြီး ရေးထားတဲ့ ဖိုင်တစ်ခုကို အဲဒီ ကွန်ပျူတာပေါ်မှာ သိမ်းထားလိုက်တာပါဘဲ။ အဲဒီတော့ စာဖတ်ချင်တဲ့လူကို ညွန်ပြပေးတဲ့ အခါ ဘယ်နေရာမှာ ရှိတဲ့ ကွန်ပျူတာပေါ်မှာ၊ ဘယ်ဖိုလ်ဒါအောက်က၊ ဘယ်ဖိုင်ဆိုတာ ညွန်ပြပေးရပါတော့မယ်။ အဲဒီလို ညွန်ပြပေးတဲ့ အခါမှာ အလွယ်တစ်ကူ ဖြစ်အောင် ကိုယ်သိမ်းထားတဲ့ နေရာရဲ့ လမ်းကြောင်းကို နာမည်တစ်ခုနဲ့ သတ်မှတ်ထားလိုက်တာ ဖြစ်ပြီး၊ အဲဒီ လမ်းကြောင်းနာမည်ကို ဒိုမိန်းနိမ်း (Domain Name) လို့ ခေါ်တာဖြစ်ပါတယ်။ အင်တာနက် ဝက်ဘ်ဆိုဒ်ရဲ့ လိပ်စာလို့လဲ ဆိုနိုင်ပါတယ်။
ဒိုမိန်းနိမ်း (Domain Name) ကို ပေးတဲ့ အခါမှာ ကြားထဲက အစက်(Dot) ကလေးတွေ ခံထားတာ တွေ့ရပါလိမ့်မယ်။ အဲဒီမှာ ဒိုမိန်းနိမ်း (Domain Name) ကို ညာဖက် နောက်ဆုံးက စာလုံးကို အရင် ကြည့်ရင်၊ စာလုံး ၂ လုံးနဲ့ အဆုံးရှိတဲ့ ဒိုမိန်းနိမ်း (Domain Name) ကို တွေ့ခဲ့ပါက အဲဒီ စာလုံး ၂ လုံးက နိုင်ငံရဲ့ အမည်ကို ကိုယ်စားပြု ပြောထားတာလို့ နားလည်နိုင်ပါတယ်။ အချို့ ဝက်ဘ်ဆိုဒ်တွေဟာ နိုင်ငံ တစ်နိုင်ငံနဲ့ သက်ဆိုင်တဲ့ အကြောင်းများကို ဖော်ပြထားတာလို့ သိစေချင်ရင် အဲဒီလို နိုင်ငံအမည် အဆုံးသတ်မှာ ထည့်တတ်ပါတယ်။ ဥပမာ သြစတေးလျဆိုရင် .au ၊ မြန်မာဆိုရင် .mm ၊ စင်္ကာပူဆိုရင် .sg စသည်ဖြင့် တွေ့ရတတ်ပါတယ်။
အဲဒီလို နိုင်ငံ အမည် သင်္ကေတရဲ့ အရှေ့၊ သို့မဟုတ် အဲဒီလို နိုင်ငံ အမည် မပါရှိခဲ့လျှင်လည်း ဒိုမိန်းနိမ်း (Domain Name) ရဲ့ ညာဖက် နောက်ဆုံးမှာ စာလုံး ၂လုံး၊ ၃ လုံး (သို့မဟုတ်) ၄ လုံးကို တွေ့ရပါမယ်။ အဲဒါကတော့ ဝက်ဘ်ဆိုဒ်ရဲ့ အမျိုးအစားကို ဖော်ပြထားတာ ဖြစ်ပါတယ်။ ဥပမာ .com ဆိုရင် commercial ကို ကိုယ်စားပြု ခေါ်ထားတာ ဖြစ်လို့၊ .com နဲ့ဆုံးတဲ့ ဝက်ဘ်ဆိုဒ်တွေ ဆိုရင် ဒါဟာ commercial ဝက်ဘ်ဆိုဒ်လို့ ပြောလို့ရပါတယ်။ ဒီနေရာမှာ တစ်ချို့ ဝက်ဘ်ဆိုဒ်တွေဟာ commercial ဆိုဒ်တွေ မဟုတ်ဘဲလဲ .com သုံးတာမျိုး တွေ့ရမှာပါ။ အဲဒါကတော့ ဝက်ဘ်ဆိုဒ်လုပ်တဲ့ သူမှာ အင်တာနက် ဒိုမိန်းနဲ့ ပတ်သက်တဲ့ ဗဟုသုတ မရှိတာ ဖြစ်နိုင်သလို၊ လူအများက .com ဘဲလွယ်လွယ်ကူကူ သိလို့ .com ရောချလိုက်တာမျိုး ဖြစ်နိုင်ပါတယ်။ ဘာဘဲဖြစ်ဖြစ် .com ဆိုတာကတော့ commercial ဝက်ဘ်ဆိုဒ်တွေကို ကိုယ်စားပြုတာဘဲ ဖြစ်ပါတယ်။ အလားတူ .net ဆိုရင် အင်တာနက် network နည်းပညာ နှင့် ပတ်သက်တဲ့ ဝက်ဆိုဒ်များ၊ .org ဆိုရင် အမြတ်အစွန်း မရှိတဲ့ ကုသိုလ်ဖြစ် အဖွဲ့အစည်းများ နှင့် အခြား စီးပွားရေး မဟုတ်တဲ့ အဖွဲ့ အစည်းများ၊ .biz ဆိုရင် အသေးစား စီးပွားရေးလုပ်ငန်းများ၊ .info ဆိုရင် သတင်း အချက်များဆိုင်ရာ ဝက်ဘ်ဆိုဒ်များ စသည်ဖြင့် ဝက်ဘ်ဆိုဒ် အမျိုးအစားများကို ခွဲပြထားတာ ဖြစ်ပါတယ်။
အဲဒီလို ဝက်ဘ်ဆိုဒ် အမျိုးအစားခွဲခြားပြတဲ့ ဒိုမိန်းအမည် စကားလုံး ရှေ့မှာမှ မိမိ နှစ်သက်ရာ အမည်ကို ပေးကြပါတယ်။ ဥပမာ၊ “အောင်အောင်” ဆိုတဲ့ အမည်နဲ့ စီးပွားဖြစ် လုပ်ငန်း သဘောမျိုး ဝက်ဘ်ဆိုဒ် တစ်ခုလုပ်မယ် ဆိုရင် aungaung.com လို့ ပေးလို့ ရသလို၊ ဒီနာမည်နဲ့ ကုသိုလ်ဖြစ် လူမှုရေး အသင်းဝက်ဘ်ဆိုဒ် လုပ်မယ် ဆိုရင် aungaung.org စသည်ဖြင့် ပေးကြပါတယ်။ တခါ အဲဒီ လုပ်ငန်း၊ အသင်းဟာ သြစတေးလျမှာ အခြေချပြီး လုပ်ကိုင်တာ သိစေလိုလျှင်၊ သို့မဟုတ် သြစတေးလျ နိုင်ငံအတွင်းမှာသာ သက်ဆိုင်တာမျိုးကို ပြချင်လျှင် နောက်က .au ဆိုပြီး နိုင်ငံရဲ့ သင်္ကေတ တွဲသုံးပါတယ်။ ဒါကတော့ ဒိုမိန်းနိမ်း (Domain Name) လို့ခေါ်တဲ့ အင်တာနက် ဝက်ဘ်ဆိုဒ်ရဲ့ လိပ်စာနဲ့ ပတ်သက်တဲ့ အခြေခံ ဗဟုသုတ တစ်ခုပါဘဲ။
တစ်ခါ အဲဒီ ဒိုမိန်းနိမ်း (Domain Name) နဲ့ လမ်းကြောင်းပြထားတဲ့ နေရာမှာဘဲ၊ ကွဲပြားတဲ့ အကြောင်းအရာကို ထပ်ခွဲ ပြတဲ့ အခါမျိုးမှာ နောက်နှစ်သက်ရာ အမည်တစ်ခုကို ပထမ ဒိုမိန်းနိမ်း (Domain Name) ရဲ့ အရှေ့မှာ ပေးကြပါတယ်။ ဥပမာ google.com ဆိုရင် ဒါဟာ အင်တာနက် ဝက်ဘ်ဆိုဒ်တွေကို ရှာဖွေတဲ့ လုပ်ငန်းနဲ့ သက်ဆိုင်တဲ့ စာမျက်နှာကို ပြထားတာ ဖြစ်ပေမဲ့၊ သူတို့ဟာ ဓါတ်ပုံ သိမ်းဆည်းတဲ့ ဝန်ဆောင်မှု အတွက် အခြားမတူတဲ့ ဝန်ဆောင်မှု အတွက် အရှေ့မှာ picasaweb ကိုခံပြီး picasaweb.google.com ၊ စာရွက်စာတမ်းများ သိမ်းဆည်းတဲ့ ဝန်ဆောင်မှု အတွက် doc ကို ရှေ့မှာခံပြီး docs.google.com လို့သုံးတာ စသည်ဖြင့် တွေ့နိုင်ပါတယ်။ အဲဒီလို မူလ ဒိုမိန်းနိမ်း (Domain Name) ရဲ့ အရှေ့က ခံပြီးသုံးတဲ့ အမည်ကို Sub-Domain (ဒိုမိန်းအခွဲ) လို့ ဆိုပါတယ်။ အင်တာနက် ဝက်ဘ်ဆိုဒ် လိပ်စာ အခွဲလို့လည်း ဆိုနိုင်ပါတယ်။
အထက်မှာ ပြောခဲ့သလို ဒိုမိန်းနိမ်း (Domain Name) ဆိုတာ အင်တာနက်နဲ့ ချိတ်ဆက်လို့ ရတဲ့ ကွန်ပျူတာ တစ်ခုပေါ်က ကိုယ့်ဖိုင်တွေ သိမ်းဆည်းထားတဲ့ နေရာကို ညွန်ပြတဲ့ လမ်းကြောင်းနာမည် လိပ်စာ ဖြစ်တဲ့ အတွက်၊ ဝက်ဘ်ဆိုဒ် ပိုင်ရှင်များ အနေနဲ့ သူတို့ သိမ်းထားတဲ့ ဖိုင်တွေကို ပြင်ဆင်တာ၊ ဖျက်ပစ်တာ၊ ထပ်ဖြည့်တာ၊ စသည်ဖြင့် လုပ်လိုလျှင်လည်း ဒီလမ်းကြောင်း နာမည်ကိုဘဲ အသုံးပြုကြ ရတာ ဖြစ်ပါတယ်။ အဲဒီလို ကိုယ်ပိုင် ဖိုင်တွေကို စီမံခန့်ခွဲ ပြင်ဆင်မှုတွေ လုပ်တော့မယ် ဆိုလို့ ဖိုင်တွေ သိမ်းဆည်းထားတဲ့ နေရာ လမ်းကြောင်းကို သွားတဲ့ အခါမျိုးမှာတော့ ဒိုမိန်းနိမ်း (Domain Name) ရဲ့ အရှေ့ ဘယ်ဘက်ဆုံးမှာ ftp. ဆိုပြီး ခံသုံးပါတယ်။ FTP ဆိုတာက file transfer protocol ဖြစ်ပါတယ်။ အဲဒီလို ဒိုမိန်းနိမ်း (Domain Name) အမည်အရှေ့ကနေ ခံပြီး သုံးတဲ့ အမည်များကို Host name လို့ ခေါ်ပြီး Host name ဆိုတာ ကိုယ့်ဖိုင်တွေ သိမ်းထားတဲ့ ကွန်ပျူတာနဲ့ ချိတ်ဆက်တဲ့ ပုံစံကို ညွန်ပြတာဖြစ်ပါတယ်။ သူလဲဘဲ အင်တာနက် လိပ်စာ အခွဲ တစ်မျိုး ဖြစ်ပါတယ်။ ဒါကြောင့် အီးမေးလ် သုံးချင်တဲ့ အခါဆိုရင်တော့ mail. ဆိုပြီး အရှေ့မှာ ခံသုံးရသလို၊ အင်တာနက် ကြည့်ချင်တယ် ဆိုရင် www. ဆိုပြီး အရှေ့မှာ ခံသုံးရပါတယ်။ www ဆိုတာက world wide web ကို ညွန်းပါတယ်။
ယခုနောက်ပိုင်း ဒိုမိန်းနိမ်း (Domain Name) နဲ့ ပတ်သက်ပြီး အင်တာနက် အသုံးပြုသူတွေ အတွက် အင်တာနက် ကြည့်တဲ့ ပရိုဂရမ်များ (Internet Browsers)၊ ဒိုမိန်း အမည် လမ်းကြောင်း ညွန်ပြပေးသည့် စံနစ်များမှာ ပိုမိုကောင်းမွန် တိုးတက်လာပါတယ်။ ရှေးကဆိုလျှင် ဒိုမိန်း အမည်နောက်ဆုံးတွင် အစက် (dot) မချလျှင် သက်ဆိုင်ရာ ဝက်ဆိုဒ် စာမျက်နှာ မပေါ်ပါ။ ဒိုမိန်း အမည်၏ နောက်ဆုံးတွင် အမြဲတမ်း အစက် (dot) ချပေးရသည်။ ဥပမာ www.google.com. ဟု ရိုက်ပေး ရပါသည်။ ယခု ထိုကဲ့သို့ နောက်ဆုံးတွင် အစက်ချပေးရန် မလိုတော့ဘဲ သက်ဆိုင်ရာ ဝက်ဘ်စာမျက်နှာသို့ အရောက် ညွန်းပေးနိုင်အောင် စီမံထားပေးသည်။ အလားတူ သာမာန် အင်တာနက် ကြည့်သည့် အခါမျိုးမှာလည်း www ကိုရိုက်ရန် မလိုတော့ဘဲ၊ ဥပမာ google.com ဟု ရိုက်ရုံဖြင့်ပင် google ၏ စာမျက်နှာ ပေါ်လာအောင် စီမံထားသည်။ ထို့ကြောင့် ယခု aung.info သို့ လာရောက်လျှင်လည်း www ရှေ့က မခံဘဲ လာရောက်နိုင်ပါသည်။
ယခုလောက်ဖြင့် ဒိုမိန်းနိမ်း (Domain Name) ဆိုတာ အင်တာနက် ဝက်ဘ်ဆိုဒ် လိပ်စာ တစ်ခု ဖြစ်ပြီး၊ အင်တာနက် လိပ်စာ အခွဲ Sub-Domain Name ပုံစံ၊ www အကြောင်းနဲ့ .com ဆိုတာတွေကို အကြမ်းမျဉ်း ဗဟုသုတ ရရှိလိမ့်မယ်လို့ မျှော်လင့်ပါတယ်။
0 မှတ်ချက်ကလေးရေးပေးနော်.:
Post a Comment