အံ့သြလွန်းလို့ သေတော့မယ်

ကြောက်ဖော် ကြောက်ဖက်များသို့

ဗုဒ်္ဓဘာသာ အလိုအရ ဂျာနယ်သမားများ ရှေးယခင်ဘ၀များက ပြုခဲ့ဖူးတဲ့ အကုသိုလ်ကံရဲ့ အကျိုးပေးမှု ရပ်ဆိုင်းပြီး၊ ပြုခဲ့တဲ့ ကောင်းမှုကုသိုလ်ကံ အကျိုးပေးချိန်တန်ပြီလို့ ဆိုရပါမယ်။ ဥခွံထဲက ထွက်ကာစ ကြက်ပေါက်ကလေးတွေနဲ့တောင် တူနေချည်သေးရဲ့။

အမှောင်ထုထဲ ကနေ အလင်းထဲ ရောက်ကာစ ဘယ်က အန္တရာယ်များ ငါ့အပေါ် ကျရောက်လာပါ့မလဲလို့ ဇက်ကလေးပုပြီး လောကကို မရဲတရဲ အကဲခတ်နေတုန်းပဲ ထင်ပါရဲ့။ မထင်တဲ့ နေရာကနေ သိမ်းငှက်ကြီး ပေါ်လာ ချီသွားပြီး အစားခံရမလားပေါ့။

          ဒီနေ့ ကျုပ်တို့ရရှိလာတဲ့ “လွတ်လပ်ခွင့်”ဟာ မတရား အလုယူခံထားရတဲ့ ကိုယ့်ပစ္စည်း တစ်ခု နှစ်ပေါင်းများစွာ ကြာပြီးမှ အသက်သွေးချွေးတွေနဲ့ ရင်းပြီး တောင်းဆိုသူတွေက အနစ်နာခံ တောင်းဆိုခဲ့လို့ ကိုယ့်လက်ထဲ ပြန်ရောက် လာရတာပါ။

          ရှေ့က အနစ်နာခံသွားသူတွေကို ကျေးဇူးတင်ရင် သူတို့ကို ထောက်ထားရင် တစ်ခုတည်းသော ကျုပ်တို့ လုပ်ရမယ့် အလုပ်က မကြောက်ကြဖို့ပါပဲ။ မကြောက်ကြနဲ့ ဆိုတာဟာ ဆော်ဖို့ နှက်ဖို့ တိုက်ခိုက်ဖို့ သွေးထိုးပေးတဲ့ စကားမဟုတ်ပါဘူး။ ပြည်သူအတွက် အကျိုးရှိမယ်ဆိုရင် ပြည်သူ့မျက်နှာတစ်ခုတည်းကို ကြည့်ပြီး အမှန်တရားကို ရဲရဲဝံ့ဝံ့ တက်ညီ လက်ညီ ဖော်ထုတ်ကြဖို့ပါပဲ။

          ကိုယ်ကျိုးရှာသမားတွေ၊ အရည်အချင်းမရှိသူတွေ တိုင်းပြည်အတွက် ဆူးငြောင့် ခလုတ်တွေ လွှတ်တော်ထဲ မရောက်အောင်၊ ရောက်နှင့်နေပြီး ဖြစ်ရင်လည်း ဖယ်ရှားနိုင်အောင် ပြည်သူ့ဘဏ္ဍာ ကိုယ့်ဘဏ္ဍာ မှတ်နေသူတွေ၊ လုပ်ပိုင်ခွင့်တွေကို ခရိုနီတွေနဲ့ ပေါင်းပြီး ရောင်းစားနေသူတွေ၊ အကျင့်သိက္ခာ သမာဓိကို အလွဲသုံးစားလုပ်သူတွေ၊ ပြည်သူတွေရဲ့ ရိုးသားမှုနဲ့ မသိနားမလည်မှုတွေအပေါ် မတရားကုပ်သွေးစုပ်နေသူတွေ၊ အားကြီးသူတွေက အားနည်းသူတွေအပေါ် ပြုလုပ်နေတဲ့ မတရားမှုတွေ... ဖော်ထုတ်ပေးကြပါ။

ဆန္ဒသဘောထား စစ်တမ်းများ

ပြည်သူ၊ ပြည်သူ့ကိုယ်စားလှယ်နဲ့ အစိုးရအဖွဲ့ဝင်တွေ ပြည်သူ့ဆန္ဒသဘောထားကို အကဲခတ်နိုင်ဖို့ရာအတွက် ပြည်သူ့ဆန္ဒသဘောထား စစ်တမ်းကောက်ယူမှုတွေဟာ အရေးကြီးပါတယ်။ ဒါကို စာနယ်ဇင်း၊ ရေဒီယို ရုပ်မြင်သံကြားအပြင် တက္ကသိုလ်တွေကပါ ကောက်ယူ နိုင်ကြပါတယ်။ (ဖွံ့ဖြိုးပြီးနိုင်ငံများမှာတော့ တက်သိုလ်တွေဟာ အားလုံးရဲ့ ရှေ့က လျှောက်ပါ တယ်။ သူတို့ရဲ့ သုတေသနပြုမှုတွေဟာ အရေးပါပါတယ်။ ကျုပ်တို့ နိုင်ငံမှာတော့ တက်္ကသိုလ်တွေဟာ အညွန့်တွေ ကျိုးပြီး တက္ကသိုလ် ကျောင်းသားရယ်လို့ခမျာ နေစရာ အဆောင်တောင် မရှိကြရှာပါဘူး)

ဒါလေးတွေ ကောက်ပေးကြပါ

စာနယ်ဇင်းသမားများနဲ့ တက္ကသိုလ်များသာမက စာဖတ်သူများလည်း ၀ါသနာပါရင် ကောက်ယူနိုင်ပါတယ်။ လူ ၁၀၀ ကောက်ယူမယ်ဆိုရင် ၉၈ ယောက်ပဲ ကောက်ရမှာပါ။ တစ်ယောက်က ကောက်ယူသူ ကိုယ်တိုင်ဖြစ်ပြီး နောက်တစ်ယောက်ကတော့ ကျုပ်ရဲ့ သဘောထား တစ်ခါတည်း ပေးလိုက်မှာမို့ ဖြစ်ပါတယ်။ ကိုယ်ကောက်ယူသူတွေရဲ့ နာမည် လိပ်စာသို့မဟုတ် ဖုန်းနံပါတ် မှတ်သားထားနိုင်ရင် ပိုပြီး ခိုင်မာပါတယ်။ ဥပမာများက...

လက်ရှိ နိုင်ငံတော် သမ္မတကြီးကို နှစ်သက် မနှစ်သက်

ကျွန်ုပ် သဘောထား-နှစ်သက်ပါတယ်။

ဘာကြောင့်- တာဝန် ထမ်းဆောင်စဉ်က စလို့ ခုချိန်ထိ သမ္မတရဲ့ ဆောင်ရွက်ချက် အားလုံး မျှတပြီး သမာသမတ်ရှိတယ်လို့ ယူဆပါတယ်။ အဂတိကင်းရှင်းကြောင်း သတင်းမွှေးပါတယ်။

လွှတ်တော်ဥက္ကဋ္ဌကြီးနှစ်ဦးကို နှစ်သက် မနှစ်သက်

ကျွန်ုပ် သဘောထား-နှစ်သက်ပါတယ်။

ဘာကြောင့် - မျက်နှာတင်းမာပေမယ့် ရိုးသားတယ်။ အတိုက်အခံများကို လေးစားကြောင်း ပြခဲ့ပါတယ်။

လွှတ်တော်ရဲ့ ဆုံးဖြတ်ချက်တွေကို အားရ အားမရ

ကျွန်ုပ် သဘောထား-အားမရပါ။

ဘာကြောင့် - အမှန်ပြောရရင် ကျုပ်တို့ မဲဆန္ဒရှင်တွေက လူပြိန်းတွေပါ။ ကိုယ်စား လှယ်တွေကျတော့ လူတော်တွေဆိုပြီး ကျုပ်တို့က တင်မြှောက်ပေးလိုက်တဲ့သူတွေ ဖြစ်တယ်။ ဒါပေမဲ့ သတိထားပါ။ လူပြိန်းဆိုတော့ ဖြောင့်ဖြောင့်ပဲ တွေးတတ်ပါတယ်။ လွှတ်တော် ကိုယ်စားလှယ် လူတော်ကြီးများဟာ ကိုယ့်မထိခိုက်မယ့် ကိစ္စမျိုးမှာ မျှမျှတတ ဆုံးဖြတ်ကြပါတယ်။ ဒါပေမဲ့ ဥပမာ၊ လယ်သမားနိုင်ငံတစ်ခုရဲ့ လွှတ်တော်က လယ်သမား အကျိုးစီးပွားအတွက် မဲခွဲ ဆုံးဖြတ်တဲ့အခါမှာကျတော့ လယ်သမားအကျိုးစီးပွားကို မလိုလားတဲ့ ကိုယ်စားလှယ်ပေါင်း ၂၀၀ တောင် ရှိခဲ့တယ်ဆိုတာ အံ့သြထိတ်လန့်စွာ သိခဲ့ကြ ရပါတယ်။ တကယ်တော့ လယ်သမားတွေရဲ့ အကျိုးစီးပွားကို မလိုလားတဲ့ ကိုယ်စားလှယ် တစ်ယောက်တလေတောင် မရှိသင့်တာပါ။ ဘယ်လိုလဲ ကိုယ့်အကျိုးစီးပွားနဲ့ ယှဉ်လိုက်တော့ လယ်သမားအကျိုးကို ဦးစားမပေးနိုင်တဲ့ သဘောလား။

          နောက် ဥပမာတစ်ခုက “ကောင်း/ သန့် အစိုးရဖြစ်ဖို့ ပြည်ထောင်စုအစိုးရ အဖွဲ့ဝင်များ၊ တိုင်းဒေသကြီး အစိုးရအဖွဲ့ဝင်များ၊ ပြည်နယ်အစိုးရအဖွဲ့ဝင်များအဖြစ် တာဝန်ပေးအပ် ခံရသူများသည် ၎င်းတို့၏ ရွှေ့ပြောင်းနိုင်၊ မရွှေ့ပြောင်းနိုင် ပစ္စည်းနှင့် အကျိုးစီးပွားများကို ထုတ်ဖော် ကြေညာပြီး မှတ်တမ်းတင်ထားရန်” ဆိုတဲ့ အဆိုကို ၆၈ ယောက်ပဲ ထောက်ခံပြီး ၂၇၁ ယောက်က အကျောက်အကန် ကန့်ကွက်ကြသတဲ့။

          နောက် ဥပမာတစ်ခုက “နိုင်ငံတော် အခြေခံဥပဒေဆိုင်ရာ ခုံရုံးကိစ္စ” ပါပဲ။ ရိုးရိုးပြောရရင် ဒီပြဿနာက တစ်ယောက် တစ်ပေါက် ပုဏားခြောက်ယောက်ပါ။ ဒင်္ဂါးပြားကို ခေါင်းဘက်ကမြင်သူနဲ့ ပန်းဘက်က မြင်သူ ငြင်းရတဲ့ ကိစ္စပါ။ ဘယ်သူမှားတယ် ဘယ်သူမှန်တယ်က အဓိကမဟုတ်ဘူး။ ဘယ်လို ပြုမူ ဆောင်ရွက်နေကြသလဲဆိုတာ အဓိကပဲ။

အခြေခံဥပဒေပြင်သင့်/မပြင်သင့်

ကျွန်ုပ် သဘောထား-ပြင်သင့်ပါတယ်။

ဘာကြောင့် - အခြေခံဥပဒေထဲမှာ သဘောထားကွဲလွဲတဲ့ အချက်တွေကို သဘောထားကွဲသူ အားလုံး ပြည်သူကြားမှာ အပြိုင် ဟောပြောခွင့်ပြုရပါမယ်။ ပြည်သူ့ရဲ့ ဆန္ဒသဘောထားကို ကောက်ယူအလေးထားပြီးမှသာ လွှတ်တော်က ဆုံးဖြတ်သင့်ပါတယ်။

ယခု အစိုးရလက်ထက်

ဆက်သွယ်ရေး ကျေနပ်မှု ရှိ မရှိ

ကျွန်ုပ် သဘောထား-ကျေနပ်မှု မရှိပါ။

ဘာကြောင့် - တိုးတက်မှုအတွက် အကြောင်း တစ်ခုခုကြောင့် တမင် အချိန်ဆွဲထားတယ်လို့ ခံစားမိပါတယ်။ ပြည်သူအတွက် သက်သာနှုန်းနဲ့ အင်တာနက်ဆိုင်တွေ ဆက်သွယ်ရေးက ဖွင့်သင့်တယ်။

ယခု အစိုးရလက်ထက်

စည်ပင် ဆောင်ရွက်မှု ကျေနပ်မှု ရှိ မရှိ

ကျွန်ုပ် သဘောထား - ကျေနပ်မှု မရှိပါ။

ဘာကြောင့် - ခေတ်နောက်ပြန်ဆွဲပြီး အနုတ်လက္ခဏာ ပြနေပါတယ်။ ယင်တလှောင်းလှောင်းနဲ့ အမှိုက်ပုံကြီးတွေ မြင်နေရခြင်းဖြင့် စိတ်ဝင်စားမှုနဲ့ လေ့လာမှု နည်းခြင်း၊ စီမံခန့်ခွဲမှု ညံ့ဖျင်းခြင်း၊ ဘဏ္ဍာငွေ အလေအလွင့်များပြားခြင်းများ သိသာ ထင်ရှားပါတယ်။ ယင်လုံအမှိုက် ထည့်ရန် ပလတ်စတစ် ကွန်တိန်နာပုံးများနဲ့ ၎င်းကို ချိတ်ဆွဲ သွန်ယူမည့် ယာဉ်များ သုံးစွဲသင့်ပါပြီ။

          စည်ပင်ဆိုင်ရာ လုပ်ငန်းများ ဥပမာ၊ ပလက်ဖောင်းများ တိုးတက်ဖို့မဆိုထားနှင့် နဂို အခြေအနေ ပြန်ရောက်အောင်ပင် လုပ်နိုင်စွမ်းရည် မရှိပါ။

ရှစ်လေးလုံး အထိမ်းအမှတ်

ကျောက်တိုင် တည်ဆောက်သင့်

မဆောက်သင့်

ကျွန်ုပ်သဘောထား -  တည်ဆောက်သင့်ပါတယ်။

ဘာကြောင့် - ဒီနေ့ ဒီမိုကရေစီရဲ့ ကောင်းကျိုးတွေကို ပြည်သူတွေ ခံစားနေကြရတာဟာ ဘယ်သူ့ကျေးဇူးကြောင့်မှ မဟုတ်ဘဲ ရှစ်လေးလုံး ဒီမိုကရေစီ အရေးတော်ပုံရဲ့ ကျေးဇူး၊ အသက်သွေးချွေး ထောင်သွင်း အကျဉ်းချ ခံရခြင်းများဖြင့် ပေးဆပ်သွားသူတွေရဲ့ ကျေးဇူးကြောင့်ဆိုတာ နောင်လာနောက်သားများ အမြဲ အောက်မေ့သတိရ ကျေးဇူးတင် နေရခြင်းဖြင့် အာဏာရှင်စနစ်ရဲ့ ဆိုးကျိုးတွေကိုလည်း မမေ့စေချင်ပါဘူး။

ရန်ကုန်တက္ကသိုလ်

ကျောင်းသား သမဂ္ဂအဆောက်အဦ

ပြန်ဆောက်သင့်  မသင့်

ကျွန်ုပ် သဘောထား -မဆောက်သင့်ပါ။

ဘာကြောင့် -  ပြန်ဆောက်လိုက်ရင် အလွန်အကျည်းတန် အရုပ်ဆိုးပြီး သဘောထား သေးသိမ်တဲ့ အကြမ်းဖက် လုပ်ရပ်ကြီး တစ်ရပ်ကို လူတွေ လွယ်လွယ်နဲ့ မေ့သွားမှာ စိုးပါတယ်။

          ကျုပ်သဘောက အဲဒီနေရာမှာ ကွက်လပ်ထားပြီး “ဤနေရာတွင် အပြစ်ကင်းစင်သော နိုင်ငံ၏ ရင်နှစ် သည်းချာ တက္ကသိုလ် ကျောင်းသားများ၏သမိုင်းဝင် သမဂ္ဂ အဆောက် အဦသည် သဘောထား သေးသိမ်သူများ၏ အကြမ်းဖက် ဖောက်ခွဲခြင်း ခံခဲ့ရသည်” ဆိုတဲ့ ကမ်္ပည်းကျောက်စာ တိုင်လေးတစ်တိုင်ပဲ ထားလိုက်ချင်ပါတယ်။

(ဟီရိုရှီးမားမှာလိုပေါ့)     

(ပြည်သူ့ခေတ်ဂျာနယ်၊ အတွဲ-၃၊ အမှတ်-၁၁၁၊ ၂၀၁၂ ခုနှစ်၊ စက်တင်ဘာ ၁၃)    

ဘကြီးသက်