မြစ်ဆုံရေကာတာပြန်စနိုင်ရန် တရုတ် အစိုးရကုမ္ပဏီမှ ဒေသခံများကိုစည်းရုံးနေ

 

              CPI ဥက္ကဌ Mr. Lu Qizhou

မြန်မာနိုင်ငံသမ္မတဦးသိန်းစိန်အစိုးရလက်ထက် ဆိုင်းငံ့ထားသော ကချင်ပြည်နယ် မြစ်ကြီးနား ဧရာဝတီမြစ်ဆုံပေါ် တည်ဆောက်မည့်ရေကာတာစီမံကိန်းအား ပြန်လည် တည်ဆောက်နိုင်ရန် တရုတ်အစိုးရ တရုတ်စွမ်းအင်ရင်းနှီးမြှုပ်နှံမှုကုမ္ပဏီ (CPI)ကုမ္မဏီမှ တာဝန်ရှိသူများသည် စီမံကိန်းကြောင့်ပြောင်းရွှေ့ခံထားရသော အောင်မြင်သာ စံပြကျေးရွာ ဒေသခံများအား စည်းရုံးမှုပြုလုပ်နေကြောင်းသိရသည်။

မြစ်ဆုံရေကာတာတည်ဆောက်ရန် ကြိုးပမ်းနေသည့် တရုတ်အစိုးရ CPI (China Power Investment) ကုမ္ပဏီမှ တာဝန်ရှိသူ ၁၀ ဦးကျော်သည် မြစ်ဆုံရေကာတာ စီမံကိန်း ပြန်လည်ဆောက်လုပ်နိုင်ရန်အတွက် ဒေသခံများနေအိမ်သို့ ၀င်ရောက်ကာ ဇူလိုင် ၁ ရက်နေ့မှ ၃ ရက်နေ့ထိ ၃ ရက်ကြာ စည်းရုံးခဲ့ကြောင်း ဒေသခံများပြောသည်။

အောင်မြင်သာစံပြကျေးရွာရှိ နေအိမ်များသို့ တစ်အိမ်တက် တစ်အိမ်ဆင်း ဒေသခံများ၏ အသေးစိတ် လိုအပ်ချက်မှအစ မေးမြန်း၍ စည်းရုံးပြောဆို သွားခဲ့ခြင်းဖြစ်ကြောင်း ဒေသခံတစ်ဦးပြောသည်။

“မင်းတို့တွေ ဒီရေအားလျှပ်စစ် စီမံကိန်းလုပ်တာကို သဘောမတူဘူးလား။ မင်းတို့သဘော တူရင် မင်းတို့ကို လိုလေသေးမရှိအောင် ကူညီပေးမယ်။ မင်းတို့ဘယ်လိုသဘောရလဲ ဒီစီမံကိန်း ပြီးသွားရင် မင်းတို့ဘာမှ ပူစရာမလိုတော့ဘူး။ အခုက ငါတို့အားလုံး ကြိုးအားပြီး တောင်တက်နေတာ။ တောင်ထိပ်ရောက်သွားမယ်ဆိုရင် ငါတို့အားလုံးပျော်ပြီ။ လူဆိုတာ ဒုက္ခရောက်တာကို ကျော်လွှားနိုင်ပြီးမှ ပျော်ရွှင်မှုကို ရတာလို့ပြောတယ်” ဟု CPI ကုမ္မဏီမှ တာဝန်ရှိသူများပြောဆိုခဲ့ကြောင်းပြောသည်။

ထို့ပြင် အောင်မြင်သာစံပြကျေးရွာတွင် ဆောက်လုပ်ထားပေးသော ဒေသခံများ၏ နေအိမ်သစ်များကိုလည်း ခိုင်ခံ့မှုရှိမရှိ အခြေနေများမေးမြန်းခဲ့ရာ ဒေသခံများသည် မြစ်ဆုံစီမံကိန်း ရပ်နားပြီးနောက် မိမိနေရပ်သို့သာ ပြန်၍ လုပ်ကိုင်စားသောက်လိုကြောင်း ၄င်းတို့ပြောင်းရွှေ့ထားပေးသော နေရာတွင် အသက်မွေးဝမ်းကျောင်းရန် အခက်ခဲကြုံနေရကြောင်း ငြင်းဆိုခဲ့သည်ဟု ဒေသခံဆက်ပြောသည်။

 “ကျွန်တော်တို့ကတော့ ဘယ်လိုမှသဘောမတူနိုင်ဘူး။ အရင်က တန်ဖရဲကျေးရွာ (Tang Hpre mare) မှာနေခဲ့တဲ့ချိန် ကလေး ၁၀ ယောက် ဆိုလည်းကျွေးနိုင်တယ်။ အခုဒီမှာကတော့ ဘာမှလုပ်စားလို့မရတဲ့အတွက် ကလေး ၁ ယောက်တောင် ကျွေးမွေးဖို့အရမ်းခက်နေတယ်။ ကျွန်တော်တို့ကိုဆောက်ထားပေးတဲ့အိမ်တွေကလည်း အပြင်ကကြည့်မှပဲ လှတယ်။ အထဲမှာဆို ဘာမှရစရာမရှိဘူး။ နေလို့လည်းမရဘူး။ ခိုင်လည်းမခိုင်ဘူး။ မင်းတို့တစ်သက်လုံး အရမ်းပျော်အောင်ထားမယ် လိုလေသေးမရှိ ကူညီမယ်ဆိုရင်တောင် ကျွန်တော်တို့ စဉ်းစားကြည့်အုံးမယ်လို့ ပြောလိုက်တယ်။ ကျွန်တော်တို့က မင်းတို့တရုတ်တွေလို ကလေး ၁ ယောက်ထဲရတာမဟုတ်ဘူး။ ကလေးတွေအများကြီးရှိတယ်။ လိုချင်သလောက် တစ်အိမ်ထောင် ၁၀ ယောက်လဲရှိတယ်။ သူတို့တွေကို ကြည့်ဖို့အတွက် ဒီမှာနေပြီးတော့ ဘယ်လိုမှမဖြစ်နိုင်ဘူးလို့” အောင်မြင်သာဒေသခံတစ်ဦး KNG ကချင်သတင်းဌာနသို့ ပြောခဲ့ခြင်းဖြစ်သည်။

မြစ်ဆုံစီမံကိန်းအား သမ္မတမှရပ်ဆိုင်းထားသည်ဟုဆိုသော်လည်း ဆက်လက်တည်ဆောက်ရန် တရုတ်အစိုးရဖက်မှ ကြိုးပမ်းနေဆဲဖြစ်ပြီး အခြေအနေတခုကြောင့်သာ ပြန်မစနိုင်သေးခြင်းဖြစ်သည်ဟု စောင့်ကြည့်လေ့လာသူ ကချင်လူမှုဖွံ့ဖြိုးရေးကွန်ယက် KDNG မှ ပြောရေးဆိုခွင့်ရှိသူ မအားနန်ပြောသည်။

“မြစ်ဆုံဆည်စီမံကိန်း ပြန်လည်တည်ဆောက်ဖို့က တရုတ်ကုမ္ပဏီဘက်မှာလည်း ဆည်စီမံကိန်းကိုရပ်တန့်ပြီ။ မလုပ်တော့ဘူးဆိုတာ မရှိဘူး။ ခုလောလောဆယ်က စစ်ဖြစ်နေသောကြောင့် ရပ်ဆိုင်းနေတာ ဖြစ်တယ်။ ကျမတို့ဘက်ကတော့ ဒီဆည်စီမံကိန်းကို ပြန်လုပ်လာမယ်လို့မျှော်လင့်တယ်။ ဘာဖြစ်လို့လဲဆိုတော့ တရုတ်ဘက်မှာလည်း ရပ်တန့်ပြီဆိုတဲ့ တရားဝင်စာထုတ် ထားတာမရှိဘူး။ အဲ့ဒီနေရာမှာလည်း အရင်ကလို စက်ကြီးနဲ့ အလုပ်သမားများရှိနေတာကြောင့် ပြန်လုပ်လာမယ်လို့ မျှော်လင့်တယ်” ဟုပြောသည်။

မြစ်ဆုံစီမံကိန်း ရပ်ဆိုင်းခြင်းကိစ္စနှင့်ပတ်သက်၍ တရုတ်စွမ်းအင် ရင်းနှီးမြှုပ်နှံမှုကုမ္ပဏီ (CPI) ဥက္ကဋ္ဌ Mr. Lu Qizhou အား တရုတ်အစိုးရ ဆင်ဟွာသတင်းဌာနက မေးမြန်းခဲ့ရာတွင် လည်း မြစ်ဆုံစီမံကိန်း ရပ်ဆိုင်းထားသည်ဟုပြောခြင်းသည် တည်ဆောက်မှုများရပ်ဆိုင်းသည်ဟုဆိုလိုပါက ဥပဒေကြောင်းအရ ရင်ဆိုင်ရမည့် အခြေအနေများသို့ ဦးတည်သွားမည်ဖြစ်ကြောင်း ဖြေကြားသွားခဲ့သည်။

ထိုကြောင့် သမ္မတမှ ရပ်ဆိုင်းထားသော်လည်း တရုတ်အစိုးရ၏ စီမံကိန်း ပြန်လည်တည်ဆောက်ရန် ပြင်ဆင်ကြိုးပမ်းမှုများကြောင့် ဒေသခံများသည် စီးပွားရေး လူမှုရေးနှင့် သဘာဝပတ်ဝန်းကျင် ဆိုးကျိုးအန္တရာယ်များ ဆက်လက်ရင်ဆိုင်ရမည်ကို စိုးရိမ်ပူပန်နေကြသည်။

 

ဘကြီးသက်