လွှတ်တော်ကိုယ်စားလှယ်လောင်းများ ရွေးကောက်ပွဲကုန်ကျစရိတ်စာရင်း စနစ်တကျ ပြုစုတင်ပြကြရန် အသိပေးနှိုးဆော်

၂၀၁၂ ခုနှစ် ဧပြီလ ၁ ရက်နေ့တွင် ကျင်းပမည့် ကြားဖြတ်ရွေးကောက်ပွဲများတွင် ပါဝင်ယှဉ်ပြိုင်ကြမည့် လွှတ်တော် ကိုယ်စားလှယ်လောင်းများသည် သက်ဆိုင်ရာ လွှတ်တော်ရွေးကောက်ပွဲ နည်းဥပဒေ အခန်း (၁၃)ပါ ပြဋ္ဌာန်းချက်များနှင့်အညီ ရွေးကောက်ပွဲ ကုန်ကျစရိတ်များကို ကျခံသုံးစွဲကြမည်ဖြစ်ရာ အဆိုပါ ရွေးကောက်ပွဲ ကုန်ကျစရိတ် စာရင်းများကို ဥပဒေနှင့်အညီ စနစ်တကျ စာရင်းပြုစု၍ သက်ဆိုင်ရာ တိုင်းဒေသကြီး/ ပြည်နယ် ကော်မရှင်အဖွဲ့ခွဲက မဲဆန္ဒအလိုက် ရွေးကောက်တင်မြှောက်ခံရသည့် လွှတ်တော်ကိုယ်စားလှယ်၏ အမည်ကို ကြေညာသည့်နေ့မှစ၍ ရက်ပေါင်း ၆၀ အတွင်း နေပြည်တော်/ သက်ဆိုင်ရာ ခရိုင်ကော်မရှင်အဖွဲ့ခွဲသို့ ကော်မရှင်ညွှန်ကြားချက် (၃/၂၀၁၀) ၏ ပူးတွဲ(က)ပါ သတ်မှတ်ပုံစံအတိုင်း ပေးပို့တင်ပြရမည်ဖြစ်ပါသည်။ နိုင်ငံရေးပါတီ ကိုယ်စားပြု လွှတ်တော်ကိုယ်စားလှယ်လောင်းများနှင့် တစ်သီးပုဂ္ဂလ လွှတ်တော် ကိုယ်စားလှယ်လောင်းများသည် ကြားဖြတ်ရွေးကောက်ပွဲတွင် ရွေးကောက်တင်မြှောက် ခံရသည်ဖြစ်စေ၊ အရွေးမခံရသည်ဖြစ်စေ ရွေးကောက်ပွဲ ကုန်ကျစရိတ် စာရင်းတင်ပြရန် တာဝန်ရှိပြီး ဥပဒေနှင့်အညီ သတ်မှတ်ရက်အတွင်း စနစ်တကျ တင်ပြခြင်းမရှိပါက လွှတ်တော် ကိုယ်စားလှယ်လောင်းများနှင့် ယင်း၏ ရွေးကောက်ပွဲ ကိုယ်စားလှယ်တို့သည် သက်ဆိုင်ရာ လွှတ်တော်ရွေးကောက်ပွဲ ဥပဒေပုဒ်မ ၈၈(ဂ) အရ အရည်အချင်း ပျက်ယွင်းသူအဖြစ် ဆုံးဖြတ်ကြေညာခြင်း ခံရနိုင်ကြောင်း အသိပေးနှိုးဆော်လိုက်ပါသည်။ ပြည်ထောင်စုရွေးကောက်ပွဲ ကော်မရှင်၏ ၁၆.၉.၂၀၁၀ ရက်စွဲပါ ညွှန်ကြားချက် (၃/၂၀၁၀)နှင့် ပူးတွဲ(က) သတ်မှတ်ပုံစံများအား ၁၈.၉.၂၀၁၀ ရက်နေ့ထုတ် သတင်းစာများတွင် ထုတ်ပြန်ကြေညာပေးထားပြီးဖြစ်ကြောင်းသိရှိရသည်။