အကယ်ဒမီကို ရုပ်ရှင်အစည်းအရုံးကသာ ပေးတော့မည်
မြန်မာနိုင်ငံတွင် ပြန်ကြားရေးဝန်ကြီးဌာနက ပေးအပ်ခဲ့သော ရုပ်ရှင်အကယ်ဒမီ ထူးချွန်ဆုများကို ၂၀၁၂-၂၀၁၄ ဘဏ္ဍာရေးနှစ်မှစ၍ မြန်မာနိုင်ငံ ရုပ်ရှင်အစည်းအရုံးနှင့် အနုပညာလာကသားများ ကသာ ရွေးချယ်ပေးအပ်တော့မည်ဖြစ်ကြောင်း သိရသည်။
ယခုနှစ်မှ စတင်ကာ အနုပညာသမားများနှင့် လွတ်လပ်စွာ ဖွဲ့စည်းထားသော မြန်မာနိုင်ငံ ရုပ်ရှင်အစည်းအရုံးအနေဖြင့် အဆိုပါရုပ်ရှင် ထူးချွန်ဆု ချီးမြှင့်ခွင့်ကို ပထမဆုံး ရရှိခဲ့ခြင်းဖြစ်ကြောင်း သိရသည်။ “အကယ်ဒမီပေးတာနဲ့ ပတ်သက်ပြီး ကျွန်တော်တို့ ရုပ်ရှင်အစည်းအရုံးအနေနဲ့ ပြောင်းလဲ လာတဲ့ ခေတ်စနစ်တွေနဲ့အညီ အကယ်ဒမီဆုတွေကို ကျွန်တော်တို့ မြန်မာနိုင်ငံ ရုပ်ရှင်လောက သားများကသာ ပေးအပ်လိုပါတယ်လို့ ပြန်ကြားရေးဝန်ကြီးဌာန၊ ပြည်ထောင်စုဝန်ကြီးထံသို့ တင်ပြခဲ့ရာမှာ အခုဆို ကျွန်တော်တို့ ဆောင်ရွက်လိုတဲ့အတိုင်း ဆောင်ရွက်ခွင့်ရပြီ ဖြစ်ပါတယ်” ဟု မြန်မာနိုင်ငံ ရုပ်ရှင်အစည်းအရုံးမှ ဥက္ကဋ္ဌ ဦးဇင်ဝိုင်းက ပြောသည်။
“ကျွန်တော်တို့အနေနဲ့ အကယ်ဒမီပေးခွင့် ရလာပြီဆိုပေမယ့် ၂၀၁၁-၂၀၁၂ ခုနှစ်မှာ ပေးမယ်ဆိုရင် ပြင်ဆင် ဆောင်ရွက်ဖို့အတွက် အချိန်တွေမရှိ ဖြစ်နေပါတယ်။ ဒါကြောင့် ၂၀၁၄ နှစ်ဆန်းကနေ ရုပ်ရှင်ထူးချွန်ဆုတွေ စပေးပါမယ်။ ပေးမယ့် ရုပ်ရှင်ကားတွေကတော့ ၂၀၁၃ ဘဏ္ဍာရေးနှစ်အတွင်းမှာ တင်သမျှ ရုပ်ရှင်ကားတွေပဲ ဖြစ်ပါတယ်။ အဲဒီရုပ်ရှင်ကားတွေကို ကျွန်တော်တို့ ရုပ်ရှင်အစည်းအရုံးနဲ့ အနုပညာရှင်တွေက ပေးအပ်သွားမှာပါ” ဟု ဦးဇင်ဝိုင်းက ဆက်၍ ပြောခဲ့သည်။
ဘကြီးသက်
0 မှတ်ချက်ကလေးရေးပေးနော်.:
Post a Comment