အစိုးရဆရာဝန်တွေ နေ့ခင်းမှာ ပြင်ပဆေးခန်း မထိုင်ရ

ပြင်ပဆေးခန်း

ကျန်းမာရေးဝန်ကြီးဌာနအောက်ရှိ အစုိုးရ၀န်ထမ်းဆရာဝန်တွေကို အလုပ်ချိန်မနက် ၈ နာရီကနေ ညနေ ၄ နာရီ အတွင်း ပြည်ပပုဂ္ဂလိကဆေးခန်းတွေမှာဆေးကုသခြင်း၊ အခြားလုပ်ငန်းတွေလုပ်ကိုင်ခြင်းတွေ မပြုလုပ်ဖို့ ကျန်းမာရေးဝန်ကြီးဌာနက ယခုရက်ပိုင်း အတွင်း သတိပေးတားမြစ်လိုက်ပါတယ်။

´ဒီနေ့ (၆)ရက်ပဲ ဒါတွေကို မလုပ်ဖို့တားမြစ်တာသိရှိကြောင်း လက်မှတ်ထိုးလိုက်ရတယ်။ ကျန်းမာရေးဝန်ထမ်းမှန်သမျှ အကုန်လုံး အောက်ခြေအဆင့် အထိ အကုန်ပါတယ်´´လို့ မန္တလေးအထွေထွေရောဂါကုဆေးရုံကြီးမှအထူးကုဆရာဝန်ကြီးတစ်ဦးက ပြောပါတယ်။

ကျန်းမာရေးဝန်ထမ်းတွေအပါဝင် အစိုးရ၀န်ထမ်းတွေဟာ တစ်နေ့ကိုအလုပ်ချိန် ၈နာရီသတ်မှတ်ထားပါတယ်။ ဒါပေမယ့် ဌာနတစ်ချို့က ၀န်ထမ်းတွေဟာ လုပ်ငန်းလိုအပ်ချက်အရ အချိန်ပိုလုပ်ကိုင်နေရတာတွေရှိပေမယ့် အချိန်ပိုအတွက် အကျိုးခံစားခွင့်မရကြဘူးလို့ဆိုပါတယ်။

အထူးကုဆရာဝန်ကြီးကပဲ ဆက်ပြီး´´နိုင်ငံဝန်ထမ်းမို့လို့  ၈ နာရီအလုပ်လုပ်ရတာကိုမပြောပါဘူး။ ဒါပေမဲ့ အစိုးရဆေးရုံတွေမှာ လိုအပ်လာရင် အရေးပေါ် ခွဲစိတ်တာ၊ ကုသပေးတာတွေကို သတ်မှတ်အလုပ်ချိန်မဟုတ်လည်း လုပ်ရတာပါပဲ၊ စည်းမျဉ်းစည်းကမ်းအတိုင်းလုပ်မယ်ဆိုရင်လည်း ခံစားခွင့်တွေ ပါ ပေးရမယ်၊ အခုဟာ ဒုတ်ဘဲပေးပြီးတော့ မုန့်တော့မပေးဘူး ဖြစ်နေတယ်´´လို့ပြောပါတယ်။

အစိုးရဆေးရုံ၊ ဆေးခန်းတွေက ဆရာဝန်တွေဟာ နေ့ခင်းထမင်းစားချိန်အတွင်း ပြည်ပပုဂ္ဂလိကဆေးခန်းတွေမှာ အချိန်ပိုင်းထိုင်ပေးရတာတွေရှိပါတယ်၊
အခုလိုမျိုးသတိပေးတားမြစ်လိုက်တဲ့အတွက် ပုဂ္ဂလိဆေးရုံ၊ ဆေးခန်းတွေမှာ အထူးကုဆရာဝန်တွေနဲ့ ဆေးကုသဖို့ အခွင့်အလမ်းနည်းပါးလာနိုင်ပြီး
အစိုးရဆေးရုံဆေးပေးခန်းတွေမှာ လူနာအရေအတွက် ပိုများလာနိုင်ကာ အဆင်မပြေမှုတွေနဲ့ ကြုံတွေ့လာရနိုင်တယ်လို့ ဆရာဝန်အများစုက
သုံးသပ်ကြ ပါတယ်။

အမည်မဖော်လိုတဲ့ဆရာဝန်ကြီးတစ်ဦကး´´တားမြစ်ချက်အရ ကျွန်တော်တို့ဟာ အလုပ်ချိန်အတွင်း အပြင်မှာဆေးခန်းထိုင်လို့မရတော့ဘူး။ အပြင်မှာ ထိုင်လို့မရတော့ လူနာတွေက အထူးကုဆရာဝန်တွေရှိမယ့် အစိုးရဆေးရုံတွေပဲ အားကိုးလာမယ်။ အဲဒီခါကျရင် အစိုးရဆေးရုံတွေမှာoverload (လူနာများ)ဖြစ် လာနိုင်မယ်။ တစ်ဖက်က ပြန်ကြည့်ရင်လည်း ပုဂ္ဂလိကကျန်းမာရေးကဏ္ဍတိုးတက်အောင်လုပ်မယ်ဆိုတာ ဘယ်လိုလုပ်မလဲ´´လို့
မေးခွန်းထုတ်ရင်းပြောပါတယ်။

အဲဒီိဆရာဝန်ကြီးဟာ ပုဂ္ဂလိက ဆေးခန်းတစ်ခုမှာ အချိန်ပိုင်းထိုင်သူတစ်ဦးဖြစ်ပြီး ဆေးခန်းကလူနာကြည့်ပေးဖို့ ဖုန်းဆက်ခေါ်ပေ မယ့် ပြင်ပဆေးခန်း မှာ ဆေးမကုရဘူးလို့ တားမြစ်ထားသောကြောင့် ထမင်းစားနားချိန်ဖြစ်ပေမယ့် သွားရောက်ကြည့်ရှုမပေးနိုင်တာကို တွေ့ရပါတယ်။

ပုဂ္ဂလိကဆေးခန်းကြီးတစ်ခုမှ တာဝန်ရှိသူတစ်ဦးက ´´နေ့ခင်းဘက်အရေးပေါ်ကိစ္စပေါ်လာလို့ အထူးကုဆရာဝန်ကြီးတွေမရှိရင်တော့ လိုအပ် တဲ့(investigation )လုပ်ပြီး ဖုန်းနဲ့ (treatment ) ယူရမှာပဲ၊ ဒါကိုလူနာရှင်ကမကျေနပ်ရင် ဆေးရုံကြီးကိုပဲ ပြန်(refer )လုပ်ရမှာပဲ´´လို့
ရှင်းပြပါတယ်။

အစိုးရ၀န်ထမ်းအဖြစ်တာဝန်ထမ်းဆောင်နေတဲ့ ဆရာဝန်တွေကို သတ်မှတ်အလုပ်ချိန်အတွင်း ပြင်ပဆေးခန်းကုသခွင့်၊ အလုပ်လုပ်ခွင့် တားမြစ်ထား တာကြောင့် ဆရာဝန်တွေကို အစိုးရ၀န်ထမ်းအဖြစ်ကထွက်ဖို့ တွန်းအားပေးသလိုဖြစ်နိုင်ပြီး လူနာရှင်တွေအနေနဲ့လည်း ပြင်ပပုဂ္ဂလိကဆေးခန်း ကုသမှုစရိတ်တွေလည်း မြင့်တက်လာနိုင်တယ်လို့ ဆရာဝန်ကြီးအချို့က မှတ်ချက်ပေးကြပါတယ်။

စန်းယု ( မော်ဒန် သတင်း ဂျာနယ် )