ဒီမိုကရေစီ နိုင်ငံမှာ ဆန္ဒပြပွဲတွေ မရှိစေချင်လို့ ဖြစ်နိုင်ပါ့မလား

ပြည်သူလူထုရဲ့ ပကတိ လိုလားချက်တွေ ပြည့်ဝနေရင် ဘယ်သူမှ အပင်ပန်းခံပြီး ဆန္ဒထွက်ပြနေမှာ မဟုတ်တာကတော့ အရှင်းဆုံးလို့ ဆိုရပါမယ်။ တာဝန်ရှိသူတွေဟာ လူထု လိုလားချက်တွေ ပြည့်ဝအောင် ဘယ်လိုလုပ်ကြမလဲ။ ဘယ်သူတွေက တာဝန်ယူပြီး လုပ်ပေးကြမှာလဲ၊ လုပ်ပေးကြတဲ့အခါမှာ ဘာကို အခြေခံပြီး လုပ်ပေးရမလဲ...စသဖြင့် လေးနက် ကျယ်ပြန့်စွာ မြော်မြင်ပေးနိုင်မှ အောင်မြင်နိုင်မှာ ဖြစ်ပါတယ်။

ပြည်သူနဲ့ အစိုးရ ဆိုတာ နိုင်ငံတခု ငြိမ်းချမ်း ဖွံ့ဖြိးစွာ တည်တန့်နိုင်ဖို့ အဓိက အကျဆုံး ခွဲခြားသတ်မှတ်ထားရတဲ့ လူသားအရင်းအမြစ် ဖြစ်ပါတယ်။ တိုင်းပြည်ရဲ့ အစစ်အမှန် တန်ဖိုးအရှိဆုံး အင်အားဖြစ်ပါတယ်။

ရွှေပုံကြီးပေါ်မှာ ထိုင်နေရုံသက်သက်နဲ့ ထမင်းစားရမှာ မဟုတ်ပါဘူး။ ပိုင်တဲ့ ရွှေတွေကို ထုခွဲရောင်းချ ပေးကမ်းပြီး ထမင်းစားဖို့တော့ အနည်းဆုံး လုပ်ယူရပါမယ်။

ကမ္ဘာဦးအစ လူသားတွေ စဖြစ်လာတုန်းက ပတ်ဝန်းကျင် သဘာဝကိုသာ အမှီပြုရင်း လူသားမျိုးဆက်ကို တည်တန့်စေခဲ့တာပါ။ ဒါကြောင့် ရွှေငွေ သယံဇာတတွေက အဓိက မဟုတ်ပါဘူး။ ရှိနေရင်လည်း အမြော်အမြင်ရှိရှိ အသုံးချနိုင်ရမှာသာ ဖြစ်ပါတယ်။

လိုရင်းကတော့ လူက အဓိက ဖြစ်ပါတယ်။ လူမှာ အသိဥာဏ်ကောင်းကောင်းရှိမှ နည်းလမ်းကောင်းတွေကို ကြံဆနိုင်မှာ ဖြစ်ပါတယ်။

တကယ်တော့ အစိုးရဆိုတာ လူထုကြားထဲက ပေါက်ဖွားလာသူတွေပါပဲ။ နိုင်ငံ့ရေးရာ ကိစ္စတွေကို စီမံခန့်ခွဲ လုပ်ဆောင်နိုင်ဖို့ အရည်အချင်းရှိသူတွေကို လူထုကိုယ်စားလှယ်အဖြစ် လူထုက ရွေးကောက်ပွဲတွေကတဆင့် ခန့်အပ်ထားသူတွေသာ ဖြစ်ပါတယ်။ နိုင်ငံ့တာဝန်ကို အခကြေးငွေရယူပြီး လုပ်ဆောင်ကြလို့ နိုင်ငံ့ဝန်ထမ်းလို့ ခေါ်လိုက်ကြပါတယ်။

နိုင်ငံ့ဝန်ထမ်းတွေ ထမ်းဆောင်ရတဲ့ တာဝန်မှာ အထက်က ပေးလာတဲ့ အမိန့် ညွှန်ကြားချက်တွေကို တသွေမတိမ်း လိုက်လုပ်ရုံနဲ့ လုံလောက်တဲ့ တာဝန်ကျေမှုလို့ မဆိုနိုင်ပါဘူး။ ညွှန်ကြားသူနဲ့တကွ လိုက်နာထမ်းဆောင်ရသူတို့ အားလုံးရဲ့ အသိစိတ်ဟာ ကိုယ်ကျင့်တရား ဖြောင့်မတ်မှုနဲ့အတူ ဒီမိုကရေစီအပေါ် အမြဲတမ်း ရာနှုန်းပြည့် အခြေခံရပါမယ်။  အဲဒီလို ဖြစ်စေတဲ့စနစ်ကို ဖန်တီးယူနိုင်ရပါမယ်။

မြန်မာနိုင်ငံကို လည်ပတ်နေစေတဲ့ ယန္တယားမှာ အဓိက အားနည်းချက်က အဲဒါပါပဲ။

ဆက်သွယ်ရေးစနစ် လျင်မြန်မှုနဲ့အတူ လူတွေရဲ့ အသိတရား နိုးကြားမှုနဲ့ တုန့်ပြန်မှုကလည်း သိပ်ကို လျင်မြန်လာနေပါတယ်။ ဒါကြောင့် တာဝန်ရှိသူ ( အစိုးရအသီးသီး + နိုင်ငံရေးပါတီ ) တို့ရဲ့ လိုအပ်သလို ပြုပြင်ပြောင်းလဲပေးနိုင်စွမ်းဟာ ခေတ်စနစ်ကို၊ လူထုလိုလားချက်ကို အလျင်မီနေစေရပါမယ်။

ပြည်သူတွေက တာဝန်ရှိသူတွေထက် နှာတဖျားသာသွားရုံနဲ့ လူထုကိုယ်စားလှယ်အသစ်တွေ ထွက်ပေါ်လာပါလိမ့်မယ်။ ဒီအသိကို တာဝန်ရှိသူတိုင်းက နားလည်နေရပါမယ်။ ဒါကို နားမလည်ဘဲ တားဆီးထိန်းချုပ်ရင်လည်း ဒီမိုကရေစီ နိုင်ငံရေးစနစ်နဲ့ အံဝင်မှာ မဟုတ်တော့ပါဘူး။  

ဒီမိုကရေစီ လူ့ဘောင်ထဲမှာ လူတိုင်းပါဝင်နေဖို့က သိပ်အရေးကြီးတဲ့ အချက်တခုပါပဲ။ ဒီမိုကရေစီ အသိုင်းအဝိုင်းထဲ မပါဘဲ နေချင်လည်း ရပါတယ်။ အဲဒီလို သီးခြား နေနိုင်ခွင့်အပေါ် ဒီမိုကရေစီက ကြည်ဖြူပေးထားပြီး ဖြစ်ပါတယ်။

မတူကွဲပြားမှုကို လက်ခံကျင့်သုံးကြရာမှာ အများစု အသိုင်းအဝိုင်းနဲ့ မဆန့်ကျင်နေသမျှ ပြဿာနာကြီးငယ် ရှိမှာ မဟုတ်ပါဘူး။ တကယ်လို့ ဆန့်ကျင်လာရင်လည်း နှစ်ဘက်ပြေလည်အောင် ဖြေရှင်းနိုင်စွမ်း ရှိရပါမယ်။ ဖြေရှင်းနိုင်စွမ်း မရှိရင် လူ့သဘာဝအရ မိမိဆန္ဒနောက်ကိုသာ လိုက်နေကြမှာ ဖြစ်ပါတယ်။

ဒီမိုကရေစီ လူ့ဘောင်ထဲမှာ ပါဝင်နေကြပြီဆိုရင် လူတိုင်းဟာ အရည်အချင်း လိုအပ်ရင် ထပ်ဖြည့်ဆည်းရမှာပါပဲ။ မိမိထက်သာသူကို တွန်းပို့ ထောက်ခံရဲတဲ့ အပြုအမူကောင်းတွေ လေ့ကျင့်ယူ၊ ကျင့်သုံးတတ်ရပါမယ်။

ဆန္ဒပြတာတွေကို မရှိစေချင်ရင် ဥပဒေ အမိန့်တွေနဲ့ တားမြစ်လို့ မရနိုင်တဲ့အကြောင်း သဘောမျှ ရေးသားလိုက်ခြင်း ဖြစ်ပါတယ်။ တကယ်ဆိုရင် ပြည်သူတွေက ဆန္ဒပြလာကြမှသာ အစိုးရအနေနဲ့ မိမိလိုအပ်ချက်ကို သိရှိပြီး ထပ်မံ ဖြည့်ဆည်းပေးနိုင်ရင် အစိုးရလည်း ဂုဏ်တက်တာပါပဲ။

ဆန္ဒပြရာမှာ အရပ်သား ပြည်သူတွေကသာ ဆန္ဒပြတာ မဟုတ်သေးပါဘူး။ နိုင်ငံ့ဝန်ထမ်းတွေလည်း အလားတူ ဆန္ဒပြပိုင်ခွင့် ရှိနေပါတယ်။ လုပ်ငန်းခွင်တွေမှာ ဝန်ထမ်းတွေရဲ့ ပကတိ လိုအပ်ချက်တွေ ရှိနေတတ်ပါတယ်။ ဖြည့်ဆည်းပေးနိုင်စွမ်း အားကောင်းရင် ဘယ်သူမှ ဆန္ဒပြမှာ မဟုတ်တာကတော့ သေချာပါတယ်။

အခြားတဖက်က ပြန်တွေးစရာတွေကိုလည်း ချင့်ချိန်စဉ်းစားရပါမယ်။ ဥပမာ- လူ့အလို နတ်မလိုက်နိုင် ဆိုတာမျိုးတွေပါ။ တောင်းလို့ ရမှန်း သိနေရင် ပေးမဆုံးတော့ပါဘူး။ မပေးနိုင်တဲ့ တနေ့ ပြဿနာ တက်လာနိုင်ပါတယ်။ ပြည်သူတွေဟာ ကာလံ-ဒေသံ-ပယောဂံအလိုက် တကယ်လိုအပ်ရဲ့လား.. ဘယ်လောက်ထိ ဖြည့်ဆည်းပေးနိုင်လဲ.. နောက်ဆက်တွဲ သက်ရောက်မှုက ဘယ်လိုရှိမလဲ .. စသဖြင့် အစိုးရဘက်က ချင့်ချိန်နိုင်စွမ်းအား ကောင်းဖို့ လိုအပ်တဲ့ အကြောင်းပါ။

ဒီလိုပဲ တောင်းဆိုသူတွေဘက်ကလည်း အမှန်တတကယ် “ပကတိ လိုလားချက်” သာ ဖြစ်ရပါမယ်။ လူထုဘက်က အမြော်အမြင် ရှိဖို့ဆိုတာက သိပ်ဖြစ်နိုင်ပါတယ်။ ဘာကြောင့်လဲဆိုတော့ တနိုင်ငံလုံးက ပြည်သူတွေကို ကိုယ်စားပြု တောင်းဆိုရတာ ဖြစ်လို့ လူထုထဲမှာ တွေးတောကြံဆ မြော်မြင်တတ်သူတွေ အမြဲတမ်း နိုးနိုးကြားကြား ရှိနေတာကြောင့်ပါပဲ။

ဒီလိုပဲ မတူကွဲပြားစွာ အတူယှဉ်တွဲ နေထိုင်ကြတဲ့ လူ့ပတ်ဝန်းကျင်မှာ လူနည်းစုတွေရဲ့ ကောင်းကျိုးချမ်းသာ ကိစ္စကိုလည်း လစ်လျူမရှိုဘဲ အလေးအနက် ထားရမှာ ဖြစ်ပါတယ်။

ဒါတွေ..ဒါတွေသာမက တွေးတောကြံဆနိုင်သမျှ အားလုံးကို အဆင်ပြေအောင် ပြင်ဆင် စီမံ လုပ်ဆောင်ထားနိုင်ရင် ဆန္ဒပြပွဲတွေ လျော့ပါးသွားမှာ ဖြစ်ပါတယ်။ ဒါပေမယ့် ဆန္ဒပြပွဲ မဖြစ်ဖူးတဲ့ ဒီမိုကရေစီနိုင်ငံရယ်လို့ ကမ္ဘာမှာ မရှိပါဘူး။ ဒီမိုကရေစီ ဖြစ်ထွန်းလာဖို့သာမက ရေရှည် တည်တန့်ခိုင်မြဲစေဖို့ ရွေးကောက်ပွဲ၊ လွှတ်တော်၊ တရားဥပဒေ စိုးမိုးမှု၊ အခြေခံဥပဒေ၊ နိုင်ငံရေးပါတီ၊ အပြန်အလှန် အာဏာထိန်းကျောင်းမှု စတာတွေနဲ့အတူ ဆန္ဒပြတာကလည်း ဒီမိုကရေစီရဲ့ အရေးပါတဲ့ အခြေခံ အုတ်မြစ်တခု ဖြစ်နေပါတယ်။

လွင်အောင်စိုး

၂၃-၉-၂ဝ၁၂

..............................

ဘကြီးသက်