မနေ့က စစ်ဆင်ရေးအတွက် ပြင်ဆင်မှု (ဓာတ်ပုံများ ~ ဧရာဝတီ)မြန်မာဆန်တွေ မြ၀တီကနေ မဲဆောက်ဘက် နေ့စဉ် အိတ် ၁၀,၀၀၀ နီးပါး ၀င်ရောက်နေတာကို ပိတ်ပင်ဖမ်းဆီးဘို့ မနေ့က စတင်ပြုလုပ်မယ့် စစ်ဆင်ရေး ပျက်သွားပါတယ်။
မြန်မာနဲ့ထိုင်းဆန်ကုန်သည်တွေက စစ်ဆင်ရေးအကြောင်း ကြိုတင် သတင်းရရှိ သွားတဲ့အတွက် အဲဒီစစ်ဆင်ရေး ပျက်သွားခဲ့ရတာလို့ ဆိုပါတယ်။
အဲဒီ စစ်ဆင်ရေးကို မဲဆောက်အခြေစိုက် အမှတ် ၄ ဒေသဆိုင်ရာကွပ်ကဲရေးတပ်၊ နယ်ခြားစောင့်ရဲတပ်ဖွဲ့၊ မြို့နယ် အုပ်ချုပ်ရေးရုံးအဖွဲ့၊ အကောက်ခွန်ဌာန၊ လူဝင်မှုကြီးကြပ်ရေးအဖွဲ့တို့ စီစဉ်ခဲ့ကြတာပါ။
မြန်မာဆန်ဝယ်တဲ့ထိုင်းကုန်သည်တဦးက “မြ၀တီဘက်ကနေမဲဆောက်ကို ညစဉ် အိတ်ရေ တသောင်းနီးပါး ပုံမှန် ၀င်ပါတယ်။ အများစုကို ညဘက် ပို့ပြီး အချို့ကိုတော့ နေ့ဘက်မှာ ပို့ကြတာလည်း ရှိပါတယ်။
အခြေအနေပေးသလိုပဲ။ ဒီလိုဖြစ်ဘို့အတွက် နှစ်ဘက်အာဏာပိုင်တွေကို ပေးရ ကမ်းရပါတယ်။ အဲလိုမှမလုပ်နိုင်ရင် မဲဆောက်ဘက်ကို ဆန်စေ့တစေ့တောင် ၀င်ဖို့ မလွယ်ပါဘူး” လို့ ပြောပါတယ်။
တအိတ်ကို ဆန် ကီလို ၅၀ ၀င်တယ်လို့ ဆိုပါတယ်။ဒီဆန်တွေကို မဲဆောက်ဒေသ ဈေးကွက်မှာ ဘယ်လို ဖြန့်နေပါသလဲဆန်ကုန်သည်ဦးမာမက်က “အဓိကဈေးကွက်က မဲဆောက်ဒေသမှာရှိတဲ့ မြန်မာအလုပ်သမား ၂ သိန်းနဲ့ထိုင်း အစားအစာနဲ့မွေးမြူရေးလုပ်ငန်းရှင်တွေ ဖြစ်တယ်။
မဲဆောက်ဘက်မှာရှိတဲ့ အထည်ချုပ်စက်ရုံ ၂၀၀ မှာ အလုပ်လုပ်နေကြတဲ့ မြန်မာအလုပ်သမား ၁ သိန်းကျော်ကို စက်ရုံကကျွေးတဲ့ထမင်းဟာ ဗမာဆန်တွေပဲ ဖြစ်တယ်။
ဗမာဆန်ဈေးက ထိုင်းဆန်ထက်ကို သုံးချိုးတချိုး ဈေးသက်သာလို့ဖြစ်တယ်” လို့ ပြောပါတယ်။
မြန်မာဆန်ကို ထိုင်းဘက်မှာ ဆန်ခေါက်ဆွဲ၊ ဆန်မုန့်တီ၊ ဆန်ကြာဇံ ပြုလုပ်ရာမှာ သုံးကြပြီး မွေးမြူရေးလုပ်ငန်းရှင်များက တိရိစ္ဆာန်အစားအစာထုတ်လုပ်ရာမှာ အသုံးပြုကြတယ်၊ တခြားမြို့၊ တခြားခရိုင်များကိုလည်း ထပ်ဆင့် တင်ပို့တယ် လို့ ကုန်သည်တွေက ပြောပါတယ်။
မြန်မာအစိုးရအတွက် နစ်နာချက်
မြ၀တီက ဆန်ပွဲစားပြောတာက “မြန်မာဆန်ကို ဒီလို တရားမ၀င်နည်းနဲ့ထိုင်းဘက်ပို့တာ မြန်မာအစိုးရဘက်က အခွန်အတုတ်တွေ မရတာ သိပါတယ်။ ဒီနည်းကလွဲပြီး အခြားနည်းမရှိလို့ပါ။
မြန်မာဘက်က သတ်မှတ်ထားတဲ့ နယ်စပ်ကုန်သွယ်ရေး ကန့်သတ်ချက်တွေက ကုန်သည်တွေအတွက် ဘယ်လိုမှ ဖြစ်နိုင်ခြေ မရှိလို့ပါ။
အများစု လက်ခံပြီး အလုပ်ဖြစ်မယ့် အနေအထားတွေရောက်မှပဲ နယ်စပ်တွေမှာ တရားမ၀င်ကုန်သွယ်တဲ့ လုပ်ငန်းတွေ လျှော့နည်းသွားမှာဖြစ်တယ်” ဆိုပြီး သုံးသပ်ပြောဆိုပါတယ်။
မြန်မာဆန်ကုန်သည်တွေကတော့ ထိုင်းဘက်မှာ စစ်ဆင်ရေးရှိတဲ့အတွက် ဆန်တွေကို မြ၀တီဘက်က အဆင်ပြေတဲ့နေရာမှာ စုပုံထားပြီး အခြေအနေကောင်းတဲ့ အချိန်ကြမှ မဲဆောက်ဘက် ပြန်ပို့မယ်လို့ ပြောနေကြပါတယ်။
ဘကြီးသက်
0 မှတ်ချက်ကလေးရေးပေးနော်.:
Post a Comment
Thank you Visit my bloge