ရန်ကုန်တိုင်းဒေသကြီး လူကုန်ကူးသူများ ကျက်စားရာအများဆုံးနှင့် ဖြစ်ပွားမှုအများဆုံး

၅ နှစ်တာ ကာလအတွင်း မြန်မာနိုင်ငံ၏ တိုင်းဒေသကြီးနှင့် ပြည်နယ်များတွင် ဖြစ်ပွားခဲ့သည့် လူကူးသည့် ဖြစ်ပွားမှုများကို ကြည့်ပါက လူကုန်ကူးမှု အများဆုံးဖြစ်ပွားသည့် ဒေသနှင့် လူကုန်ကူးသည့် တရားခံအများဆုံး ကျက်စားရာဒေသသည် ရန်ကုန်တိုင်းဒေသကြီးဖြစ်ကြောင်း ပြည်ထဲရေးဝန်ကြီးဌာန၊ လူကုန်ကူးမှု တားဆီးကာကွယ်ရေးဗဟို အဖွဲ့မှ ထုတ်ပြန်ချက်အရ သိရသည်။ ၂၀၀၆ ခုနှစ် ဇန်နဝါရီမှ ၂၀၁၁ ခုနှစ် ဒီဇင်ဘာ ၃၁ ရက်အထိ ၅ နှစ်တာကာလအတွင်း လူကုန်ကူးမှု အများဆုံးဖြစ်ပွားသည့် မြို့နယ် ၄၂ မြို့နယ်ရှိသည်။ ၎င်းတို့အနက် ရန်ကုန်တိုင်း ဒေသကြီးမှ လှိုင်သာယာ၊ ဒလ၊ ဒဂုံမြို့သစ် (တောင်ပိုင်း)၊ သန်လျင်၊ ရွှေပြည်သာ၊ ဒဂုံမြို့သစ် (ဆိပ်ကမ်း)၊ အင်းစိန်း၊ မြောက်ဥက္ကလာပ၊ မင်္ဂလာဒုံ၊ မရမ်းကုန်း၊ သာကေတနှင့် တောင်ဥက္ကလာပမြို့နယ် ၊ ရှမ်းပြည်နယ် မြောက်ပိုင်းမှ မူဆယ်၊ လားရှိုး၊ ကွတ်ခိုင်၊ သီပေါ၊ ကျောက်မဲ၊ သိန်းနီ၊ နမ့်ခမ်း၊ နမ္မတူ၊ နောင်ချို၊ လောက်ကိုင်။ မန္တလေးတိုင်းဒေသကြီးမှ ပြည်ကြီးတံခွန်၊ ချမ်းမြသာစည်၊ ချမ်းအေးသာယာ၊ အောင်မြေသာစံ၊ မဟာအောင်မြေ။ ပျော်ဘွယ်၊ ရမည်းသင်း၊ မိတ္ထီလာနှင့် ပုသိမ်ကြီးမြို့နယ်။ ကချင်ပြည်နယ်မှ မြစ်ကြီးနား၊ ဝိုင်းမော်၊ ဗန်းမော်နှင့် ဖားကန့်၊ ပဲခူးတိုင်းဒေသကြီးရှိပဲခူး၊ သနပ်ပင်နှင့် ကျောက်တံခါးမြို့။ ကရင်ပြည်နယ်တွင် မြဝတီမြို့နယ်။ မွန်ပြည်နယ်မှ ကျိုက်မရောမြို့နယ်။ ရှမ်းပြည်နယ်အရှေ့ဘက်ရှိ တာချီလိတ်မြို့နှင့် တနသာင်္ရီ တိုင်းဒေသကြီးရှိ ကော့သောင်းမြို့တို့ ဖြစ်သည်။ ရန်ကုန်တိုင်းဒေသကြီးတွင် သက်ဆိုင်ရာမြို့နယ်များ၌ လူကုန်ကူးခြင်းဆိုင်ရာ သတင်းပေးမှု များပြားလာခြင်းကြောင့် ဖော်ထုတ်တွေ့ရှိမှု မြင့်မားလာခြင်းဖြစ်ကြောင်း မဲခေါင်မြစ်ဝှမ်းဒေသအတွင်း လူကုန်ကူးခြင်းကို တိုက်ဖျက်သည့် ကုလသမဂ္ဂစီမံချက် အမျိုးသားစီမံချက် ညှိနှိုင်းရေးမှူး ဒေါ်ဥမ္မာအိအိချောက ပြောသည်။ ထို့ပြင် ရန်ကုန်ရှိ လူကုန်ကူးခံရသည့် အချို့မြို့နယ်များတွင် နေထိုင်သည့် သူများသည် နယ်မြို့များမှ ပြောင်းရွှေ့နေထိုင်လာသူများ အများစုဖြစ်ပြီး အလုပ်အကိုင် အခွင့်အလမ်းရှာဖွေရာတွင် အခက်အခဲများကြောင့်လည်း လူကုန်ကူးခံရမှုဖြစ်နိုင်ကြောင်း ၎င်းက သုံးသပ်ပြောကြားသည်။ ထို့ပြင် လူကုန်ကူးခံရသည့် သူများတွင် အမျိုးသမီး ၈၅ ရာခိုင်နှုန်း၊ အမျိုးသား ၁၀ ဒသမ ၇ ရာခိုင်နှုန်းနှင့် ကလေး ၄ ဒသမ ၃ ရာခိုင်နှုန်း ပါဝင်သည်ကို တွေ့ရှိရပြီး ၎င်းတို့အနက် တရုတ်နိုင်ငံသို့ ရာခိုင်နှုန်း ၈၀ ဖြင့် အများဆုံး လူကုန်ကူးခံရပြီး ထိုင်းနိုင်ငံသို့ ၁၀ ရာခိုင်နှုန်း၊ မလေးရှားသို့ ၆ ရာခိုင်နှုန်းနှင့် ပြည်တွင်းတွင် ၄ ရာခိုင်နှုန်း ရှိကြောင်း သိရသည်။ ၅ နှစ်အတွင်း လူကုန်ကူးသည့် တရားခံများကို ပြစ်ဒဏ်ချမှတ်ရာတွင် အမျိုးသား ၄၁၆ ဦး၊ အမျိုးသမီး ၆၇၃ ဦးတို့ကို မြစ်မှုများအလိုက် ထောင်ဒဏ် ၃ နှစ်မှ ထောင်ဒဏ်တစ်သက်စီ ချမှတ်ခဲ့ပြီး တရားခံပြေး အမျိုးသား ၂၀၄ ဦးနှင့် အမျိုးသမီး ၂၇၄ ဦးကို စုံစမ်းဖော်ထုတ်လျက်ရှိကြောင်းသိရှိရသည်။